«Ես եմ» ազգային նույնականացման հարթակ

 «Ես եմ» ազգային նույնականացման հարթակը անձի նույնականացման գործիքների հավաքակազմ է, որը ներառում է նույնականացման քարտով, բջջային հեռախոսով և սմարթ սարքով մուտքի լուծումները։

Էլեկտրոնային ծառայություն մատուցողները իրենց «հաճախորդներին» նույնականացնելու նպատակով ինտեգրվում են միասնական հարթակին և հարթակը վերադարձնում է հաջող նույնականացումն անցած «հաճախորդի» հանրային ծառայությունների համարանիշը, որը ծառայում է որպես անձի հիմնական նույնականացուցիչ:

Քաղաքացիների համար՝

Ծառայությունների մատուցման էջերում «Մուտք» կոճակը սեղմելով՝ Դուք վերահասցեագրվում եք նույնականացման միասնական համակարգ՝ nid.e-gov.am, որտեղ հնարավորություն ունեք ընտրելու նույնականացման հետևյալ եղանակներից որևէ մեկը՝

•  Նույնականացման քարտով մուտք․

Այս տարբերակի դեպքում անհրաժեշտ է ունենալ նույնականացման քարտ (ID card), որը ստացել եք 2023 թվականի փետրվարի 15-ից առաջ, ինչպես  նաև քարտ կարդացող սարք։ 

• Բջջային նույնականացման քարտով մուտք․

Բջջային հեռախոսակապի օպերատորից անհրաժեշտ է ձեռք բերել բջջային ID SIM քարտ և ակտիվացնել ծառայությունը։ 

• Սմարթֆոն հավելվածով մուտք(շուտով)․

Սմարթֆոնի հավելվածով նույնականացման համար հավելյալ ծրագրերի և սարքավորումների անհրաժեշտություն չկա։ Հավելվածը հասանելի է iOS և Android օպերացիոն համակարգերի համար, ինչի վերաբերյալ մենք հավելյալ կտեղեկացնենք։

• Կոնտակտային տվյալների տրամադրմամբ մուտք(ոչ խիստ նույնականացում).

Տարբերակն առկա է միայն այն էլեկտրոնային ծառայություն մատուցողների հարթակում, որոնք ծառայությունը մատուցելու համար անձի խիստ նույնականացում չեն պահանջում։

Այս տարբերակի պարագայում անհրաժեշտ կլինի տրամադրել անձնական տվյալներ՝ անուն, ազգանուն, անձը հաստատող փաստաթղթի համար և գործող էլեկտրոնային փոստի հասցե, որի հավաստման համար փոստից ստացված կոդը անհրաժեշտ կլինի հավաքել մուտք գործելու համար: 

Վերը թվարկված տարբերակներից որևէ մեկով նույնականացման գործընթացն հաջողությամբ անցելուց հետո Դուք վերադառնում եք ծառայության մատուցման նախնական էջ՝ շարունակելու Ձեր գործողությունները, որտեղ ծառայություն մատուցողն արդեն ունի Ձեր տվյալները: 

Էլեկտրոնային ծառայություններ մատուցողների համար՝

         Էլեկտրոնային ծառայությունների մատուցման Ձեր հարթակներում խիստ նույնականացման հնարավորությունն ապահովելու համար այլևս անհրաժեշտություն չկա առանձին-առանձին ինտեգրելու լուծումները, պարզապես կպահանջվի ինտեգրում ազգային նույնականացման միասնական «Ես եմ» հարթակին, որը իր մեջ ներառում է անհատի խիստ նույնականացման բոլոր եղանակները և կոնտակտային տվյալների տրամադրմամբ մուտքի հնարավորությունը։

«Ես եմ» հարթակի գործարկման իրավական հիմքերն, ինչպես նաև պետական մարմինների կայքերում գործիքակազմի ինտեգրման պահանջները սահմանված են ՀՀ կառավարության 2017 թվականի մայիսի 25-ի N 572-Ն որոշմամբ։